Stjórnmálaskóli Besta flokksins

Besti flokkurinn er auðvitað rugl og þvættingur. Reyndar yfirlýstur þvættingur. Og gefur sig ekki út fyrir að vera annað.

Allir geta verið sammála um að Besti flokkurinn nýtur stuðnings vegna þess að á Íslandi er pólitískt „tómarúm“  – stjórnmálaflokkarnir eru ekki teknir alvarlega og fólki þykir eins gott að henda atkvæði sínu í einhverja grínara og trúða.

Hvað gengur Besta flokknum til?

Mér segir svo hugur að Jón Gnarr og hans fólk hafi verið að gera tilraun til að prófa hvað stjórnmálin á Íslandi eru komin á lágt plan. Eru þau virkilega á jafnlágu plani og grínararnir hafa talið í alvörublandinni gáskaumræðu um stjórnmálin? Eru stjórnmálamenn almennt álitnir jafnmikil fífl og fábjánar í hugum allrar þjóðarinnar eins óformlegar skoðanakannanir meðal fólks á kaffihúsum og börum borgarinnar gefa til kynna? Er það virkilegt sem heyrist í kaffitímum og reykpásum að fólki almennt finnst pólitík vera hreint og klárt kjaftæði sem tekur því ekki einu sinni að fylgjast með?

Svarið virðist vera hreint og beint   JÁ.

Í rauninni er ekkert frekar um Besta flokkinn að segja. Ég held í sannleika sagt að þeir sem standa fyrir þessu framboði vilji fyrst og fremst að við tökum útkomu tilraunarinnar alvarlega… ekki endilega flokkinn og framboðið sem raunhæfan valkost.

Hverjir eru vinir þínir?

Bullukollurinn Ingi Hrafn lýsti yfir stuðningi við Besta flokkinn. Svo ég bregði fyrir mig hans eigin stíl þegar hann gefur öðru fólki einkunn: Þessi maður er einn mestur fábjáni á Íslandi sem sleikti rassinn á útrásarpakkinu með mikilli áfergju allan „góðæristímann“  og hefur aldrei verið neitt annað en slefberi Sjálfstæðisflokksins.

Einhvern tímann sagði einhver við einhvern: Segðu mér hverjir vinir þínir eru og þá skal ég segja þér hver þú ert.

Hverjir eru óvinir þínir?

Einni helstu varphænu Morgunblaðsins til margra ára er ekki skemmt. Agnes Bragadóttir baular á Besta flokkinn eins og pipruð kennslukona sem sussar á óþekka stráka sem skaprauna henni. Og rétt eins og ófullnægðum kennslukonum þykir henni eigin geðshræringar vera rök í málinu – þetta er ekki gaman lengur, ég er hneyksluð og svona hættið nú.

Hin áhugaverða spurning er sú hvers vegna Agnes Bragadóttir vill endilega að Besti flokkurinn dragi framboð sitt til baka.

Svarið við þessari spurningu er augljóst. Agnes Bragadóttir telur almenning samansafn af fávísu fólki sem hægt er að plata. Þess vegna þarf að gæta þess að bjóða þessum vitleysingum ekki uppá valkosti sem tjá fávisku þeirra og skammsýnt alvöruleysi. Hafa verður vit fyrir fólkinu og smala enn sem fyrr öllum þessum kúltúrlausu bjálfum til að kjósa Sjálfstæðisflokkinn.

Ef við gætum spólað mannkynssöguna sossum eins og 150 ár aftur í tímann þá hefði þessi varphæna Morgunblaðsins skipað sér í sveit þeirra manna sem settu sig uppá móti almennum og skilyrðislausum kosningarétti. John Stuart Mill og vinir hans töldu slíka ráðstöfun varasama því eignalaust og fátækt fólk var illa upplýst og hafði ekki nægilegt vit til að greiða atkvæði af skynsamlegu viti. En þetta getur Agnes ekki sagt – það er ekki pólitískt kórrétt. Hana langar samt voðalega til að segja þetta því það er heldur ekki pólitískt kórrétt að skamma Sjálfstæðisflokkinn hennar fyrir að láta fíflalæti ógna sér og öllu kerfinu.

Vekur það ekki einhverja umhugsun að snúa spakmælinu við: Segðu mér hverjir óvinir þínir eru og þá skal ég segja þér hver þú ert.

Viðbrögð stjórnmálamanna

Stjórnmálin á Íslandi eru á þessu lága plani sem Jón Gnarr og félagar héldu. Því miður átta stjórnmálamennirnir sjálfir sig ekkert á því. Þeir eru svo miklir popúlistar eins og Ingi Hrafn að þeir geta ekki annað en tekið framboðinu vinsamlega. Þeir eru svo spéhræddir og pólitískt kórréttir að þeir þora ekki öðru. Hvað geta þeir annað gert? Enginn þeirra hefur kjark til að standa upp og segja að þetta sér alvörulaust rugl og stórhættulegt á krepputímum – sem þeir hugsa þó allir með sjálfum sér. Þannig falla þeir á prófinu með því að segja ekki allan hug sinn.

En hvers vegna hefur enginn þeirra kjark til að segja þetta uppí opið geðið á Besta flokknum og þjóðinni? Ástæðan er einfaldlega sú að þeir hafa nákvæmlega ekkert að segja. Við þurfum ekki að eyða orðum í Sjálfstæðisflokk og Framsóknarflokk því alþýðu varðar ekkert um sálarástandið á þeim bæjum. Öðru gegnir um Samfylkinguna og Vinstrigræna sem eru einu alþýðuflokkarnir.

Gjaldþrot alþýðuflokkanna

Gjaldþrot alþýðuflokkanna er fullkomið og algert því hvergi má finna umræðu meðal þeirra sem fylla þessa flokka um það sem allir pólitíkusar alþýðunnar ættu að hafa áhyggjur af.

Veturinn 2008-9 reis alþýðufólk upp á Íslandi og fór sú hreyfing öll fram utan pólitískra flokka sem kenna sig við hana og verkalýðssamtakanna sem eiga þó að vera baráttutæki hennar. Það þurfti uppreisn í Reykjavík með bálköstum til að formaður Samfylkingarinnar vaknaði upp og sliti samstarfi við Sjálfstæðisflokkinn í ríkisstjórn – hennar hátign þvert um geð.

Einu og hálfu ári eftir hrunið gerist þetta aftur. Í borgarstjórnarkosningum í Reykjavík brýst óánægja alþýðufólks ekki út sem skipulagt og samstillt átak á vegum verkalýðssamtakanna og í kjörfylgi pólitískra flokka hennar. Nei, áhyggjur og óánægja aþýðufólks brýst út í stuðningi við trúða og þeirra fimmaurabrandara.

Hið allra versta er að stjórnmálamennirnir í Samfylkingunni og Vinstrigrænum halda að þetta hafi ekkert með pólitík að gera heldur starfshætti þeirra, hvernig þeir blaðra og hver ímynd þeirra er.

En þetta snýst allt um pólitík. Alýðuflokkarnir hafa einfaldlega ekki neina aðra pólitík fram að færa en þá sem auðvaldið hér og alþjóðlega krefst. Skerða laun, skerða lífeyri, skera niður almannaþjónustuna… allt til að bjarga alþjóðlegum fjármálastofnunum kapítalsins. Um þetta eru báðir flokkar hjartanlega sammála og kalla það raunsæi.

Máttleysi og úrræðaleysi verkalýðsflokka á krepputímum þegar engin færi eru á að sænga í vinsemd með auðvaldinu hefur kallað hræðilegar hörmungar yfir mannkynið. Sem betur fer er Besti flokkurinn samsettur af meinlausasta fólkinu í landinu sem vill engum illt. Skilaboð þessa framboðs sem enginn stjórnmálamaður virðist skilja eru þessi: „Ef þið takið ykkur ekki saman í andlitinu eftir þessa vitleysu þá verða það fasistarnir sem taka ykkur næst í rassinn!“

Því er nú verr og miður…  enginn stjórnmálamaður í Samfylkingu og Vinstrigrænum virðast nógu greindir og menntaðir til að skilja þessi skilaboð. Þeir hafa ekki sýnt það hingað til að þeir átti sig á sögulegu samhengi – enda einkunnarorð þeirra a afneita allri sögu. Og nú hafa þeir ekki græna glóru um hvers vegna í ósköpunum þeir eru í fýlu. Halda að það sé einhverjum öðrum að kenna.